World Missionary Press

BULIG HALIN SA IBABAW - Hiligaynon

BULIG HALIN SA IBABAW

Ang ini nga balasahon, "BULIG HALIN SA IBABAW, isa ka koleksyon sang mga bersikulo halin sa nagkalain-lain nga parte sang Biblia. Nagasugid ini parte sa pila ka mga topiko nga makita naton sa Biblia. Nagapati ako nga ang pinakamaayo nga komentaryo sa Biblia amo mismo ang nagkalain-lain nga mga bersikulo sini. Ang pulong sang Dios makabig naton nga "bulig halin sa ibabaw." Kay matuod gid nga makabulig ini sa mga tagipusuon nga may kauhaw kag kagutom sa matarong nga pagkabuhi. Kon gusto mo nga mabaton ang ini nga klase sang kabuhi, dapat maghinulsol ikaw kag magbiya sa imo mga sala. Dapat mo man nga pangabayon si Ginoong Jesus-Cristo nga magpuyo sa imo tagipusuon, kag tuohan mo siya sing hugot sa imo tagipusuon nga siya amo ang makaluwas sa imo mga sala. Kon himuon mo ini nga mga butang, ipahayag sang Ginoo ang iya kaugalingon sa imo, kag ihatag niya sa imo tagipuson ang iya kaugalingon nga kalipay kag kalinong. Ako mismo nakaeksperiensya sini umpisa sadtong tuig 1937. Kag padayon ko nga naeksperiensyahan ang matahom nga pagpakig-upod sang Ginoo sa akon. Gani ginapangabay ko ikaw nga itugyan mo man ang imo bug-os nga kabuhi sa iya, kag kabigon mo siya nga imo Manluluwas kag Ginoo. Himua ini subong kon wala mo pa mahimo. –Watson Goodman (1920-2002)

ANG GUGMA SANG DIOS —1

Sa wala pa mag-abot ang adlaw sang Piesta sang Paglabay sang Anghel, nahibaluan na nga daan ni Jesus nga nag-abot na ang tion nga mahalin na siya sa sini nga kalibutan kag mabalik sa Amay. Palangga gid niya ang iya mga sumulunod diri sa kalibutan, kag hasta sa katapusan ginpakita niya ang iya pagpalangga sa ila. –Juan 13:1

Kon parte kay Jesu-Cristo, siya ang masaligan nga manugpamatuod. Siya ang una gid nga nabanhaw. Kag siya man ang nagagahom sa tanan nga mga manugdumala diri sa kalibutan. Ginahigugma niya kita, kag paagi sa iya dugo ginluwas kita sa aton mga sala. –Bugna 1:5

Si Cristo nagpanginmatay para sa aton bisan sang mga makasasala pa kita. Sa sini nga paagi ginpakita sang Dios ang iya paghigugma sa aton. –Roma 5:8

Ginahigugma gid sang Dios ang kalibutan, amo gani nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi hatagan sang kabuhi nga wala sing katapusan. –Juan 3:16

ANG PAGKA-DIOS NI CRISTO JESUS —2

Sang una pa nga daan, yara na ang ginatawag nga Pulong. Ang Pulong kaupod na sang Dios, kag ang Pulong amo mismo ang Dios. Ang ginatawag nga Pulong nagpakatawo kag nagpakig-upod diri sa aton. Nakita namon ang iya kadungganan bilang bugtong nga Anak sang Amay. –Juan 1:1, 14a

Nagpakita siya bilang tawo, ginpamatud-an sang Espiritu Santo nga siya matarong, nakita siya sang mga anghel, ginwali sa kalibutan, gintuohan sang mga tawo, kag gindala pabalik sa langit. –I Timoteo 3:16b

Nagsiling si Jesus, "Kon kilala ninyo ako, kilala na man ninyo ang akon Amay. Kag halin gani karon kilala na ninyo siya kag nakita na." Nagsiling si Felipe sa iya, "Ginoo, ipakita sa amon ang Amay kag tama na ina para sa amon." Nagsabat si Jesus, "Dugay na ang aton pag-inupdanay, Felipe, pero wala pa gid gali ikaw makakilala sa akon? Ang nakakita sa akon nakakita man sa Amay. Ngaa nagasiling ka pa nga ipakita ko sa inyo ang Amay? Ano, wala bala ikaw nagapati nga ako yara sa Amay kag ang Amay yari sa akon?" –Juan 14:7-10a

SI JESUS ANAK SANG DIOS —3

Nagsabat ang anghel [kay Maria], "Magaabot sa imo ang Espiritu Santo, kag magalikop sa imo ang gahom sang Labing Mataas nga Dios. Gani ang balaan nga bata nga matawo sa imo kilalahon nga Anak sang Dios." –Lucas 1:35

Ginsimba [si Jesus] sang mga tawo sa sakayan nga nagasiling, "Matuod gid nga ikaw ang Anak sang Dios." –Mateo 14:33

Ang bisan sin-o nga nagasiling nga si Jesus Anak sang Dios, ang Dios yara sa iya, kag siya yara sa Dios. –I Juan 4:15

Amo ini ang balita parte sa iya Anak nga si Jesu-Cristo nga aton Ginoo: sa iya pagkatawo, kaliwat siya ni David; kag sa iya balaan nga espiritu, napamatud-an nga siya Anak sang Dios sa makagagahom nga paagi sang nabanhaw siya halin sa kamatayon. –Roma 1:3, 4

Wala pa makatapos hambal [ni Jesus], ginlikupan sila sang masilaw nga panganod kag nabatian nila dayon ang tingog halin sa panganod nga nagasiling, "Amo ini ang akon hinigugma nga Anak. Nalipay gid ako sa iya. Pamatii ninyo siya!" –Mateo 17:5

NAGASUGID SI JESUS KON SIN-O SIYA —4

Nagsiling si Jesus, "Ako ang nagabanhaw sang mga patay, kag ako man ang nagahatag sang kabuhi. Ang nagatuo sa akon, bisan mapatay pa siya, mabuhi siya liwat." –Juan 11:25

"Ginatawag ninyo ako nga Manunudlo kag Ginoo, kag husto ina, kay ako gid man ang inyo Manunudlo kag Ginoo." –Juan 13:13

Nagsiling ang babayi, "Nahibaluan ko nga magaabot ang Mesias nga ginatawag man nga Cristo. Kag kon mag-abot na siya, sugiran niya kita parte sa tanan nga mga butang." Nagsiling si Jesus sa iya, "Ako nga nagapakig-hambal sa imo karon amo ang imo ginasiling nga magaabot." –Juan 4:25, 26

Nagsiling si Jesus, "Ako amo ang pagkaon nga nagahatag sang kabuhi. Ang nagapalapit sa akon kag nagatuo indi na gid paggutumon ukon pag-uhawon." –Juan 6:35

Nagsiling liwat si Jesus, "Sa  pagkamatuod, ginasugid ko sa inyo nga ako amo ang puwertahan sang mga karnero." –Juan 10:7

ANG MGA MILAGRO NGA GINHIMO NI JESUS —5

Nagsiling si Simon kay Jesus, "Manunudlo, isa gid ka gab-i ang amon pagpangisda pero wala gid kami sang may nakuha. Pero tu-ngod kay nagsiling ikaw nga iladlad ang pukot, ti iladlad ko." Nagpalawod sila kag ginladlad nila ang ila mga pukot. Madamo gid nga mga isda ang ila nakuha kag daw magisi na ang ila mga pukot. –Lucas 5:5, 6

Ginsilingan [ni Jesus] ang mga tawo nga magpungko sa hilamon. Pagkuha niya sang lima ka tinapay kag duha ka isda, nagtangla siya sa langit kag nagpasalamat sa Dios. Dayon ginpamihak-pihak niya ang tinapay kag ginhatag sa iya mga sumulunod kag ginpanagtag nila ini sa mga tawo. Nakakaon sila tanan kag nagkalabusog. Pagkatapos nga nakakaon na ang tanan, gintipon nila ang mga nabilin, kag dose pa ka alat ang napuno. Mga 5,000 gid ka mga lalaki ang nakakaon, wala labot ang mga babayi kag mga bata. –Mateo 14:19-21

Karon, may duha didto ka bulag nga nagapungko sa higad sang dalan. Naluoy si Jesus sa ila, gani gintandog niya ang ila mga mata, kag sa gilayon nakakita sila. Dayon nagsunod sila sa iya. –Mateo 20:30a, 34

SI CRISTO JESUS MANUNUGA KAG GINOO —6

Amo gani nga si Cristo nagpakamatay kag nabanhaw, agod mangin Ginoo siya sang mga buhi kag mga patay. –Roma 14:9

"Dapat gid nga mahibaluan sang tanan nga mga Israelinhon nga ini nga Jesus nga inyo ginlansang sa krus amo ang ginpili sang Dios nga mangin Ginoo kag Cristo." –Binuhatan 2:36

Paagi sa iya kag para sa iya ginhimo sang Dios ang tanan nga mga butang sa langit kag sa duta, indi lang ang makita kundi pati man ang indi makita, pareho sa bisan ano nga mga espiritu nga may awtoridad ukon may gahom, mga espiritu nga nagapangulo ukon nagahari. –Colosas 1:16

Sa sining ulihi nga mga inadlaw, naghambal siya sa aton paagi sa iya Anak. Paagi sa iya, ginhimo sang Dios ang bug-os nga kalibutan, kag siya man ang iya ginpili nga mangin tag-iya sang tanan nga mga butang. –Hebreo 1:2

Paagi [kay Cristo], ginhimo ang tanan nga butang, kag wala gid sing may nahimo nga indi paagi sa iya. –Juan 1:3

SI JESU-CRISTO AMO ANG MAGAHUKOM SA TANAN NGA TAWO —7

Sa atubangan sang Dios kag ni Cristo Jesus may ibilin ako sa imo. Magabalik siya kag magahari, kag magahukom sa tanan nga mga tawo, buhi man ukon patay. –2 Timoteo 4:1

"Ang tanan nga mga tawo sa kalibutan pagatipunon agod mag- atubang sa akon. Dayon painon ko sila sa duha ka grupo pareho sang pagpain sang manugbantay sa mga karnero sa mga kanding." –Mateo 25:32

Indi kamo magpakanubo ukon maghukom sa inyo mga utod kay Cristo. Kay kita tanan magaatubang sa Dios, kag siya ang magahukom kon ang aton ginhimo maayo ukon malain. –Roma 14:10

Ginsugo niya kami sa pagwali sang Maayong Balita sa mga tawo kag sa pagpamatuod nga siya amo gid ang ginpili sang Dios nga ma-ngin hukom sa mga buhi kag sa mga patay na. –Binuhatan 10:42

Suno sa Maayong Balita nga akon ginatudlo, ina ipadumdom sa ila ni Jesu-Cristo sa adlaw nga siya pahukmon sang Dios sa tanan nga mga tawo. Hukman niya ang tanan nila nga mga tinago sa ila hunahuna. –Roma 2:16

ANG PAGTUBOS SA ATON MGA SALA PAAGI LAMANG KAY JESUS —8

"Amo ina nga nagsiling ako sa inyo nga magakalamatay lang kamo nga wala mapatawad ang inyo mga sala. Kay kon indi kamo magtuo nga ako amo ang Cristo, sigurado gid nga magakalamatay lang kamo nga wala mapatawad ang inyo mga sala." –Juan 8:24

Nagsiling si Jesus, "Ako amo ang dalan, ang kamatuoran, kag ang kabuhi. Wala sing may makakadto sa Amay kon indi paagi sa akon." –Juan 14:6

Sarang maluwas [ni Jesus] sa bisan ano nga oras ang bisan sin-o nga tawo nga magpalapit sa Dios paagi sa iya. Kay buhi siya sa wala sing katapusan sa pagpakitluoy sa Dios para sa ila. –Hebreo 7:25

Pagkatapos nga naagihan [ni Jesus] ang tanan nga dapat niya agihan, nangin manluluwas siya sang tanan nga nagatuman sa iya, agod hasta kon san-o, hilway na sila sa silot nga para sa ila mga sala. –Hebreo 5:9

"Wala na sing iban sa bug-os nga kalibutan nga makaluwas sa aton kundi si Jesus lang." –Binuhatan 4:12

ANG PAGTUBOS SA ATON MGA SALA PAAGI LAMANG KAY JESUS —9

Nagakanta sila sang isa ka bag-o nga kanta nga nagasiling, "Ikaw ang takos nga makakuha sang linukot nga kasulatan kag sa paghukas sang iya mga selyo, tungod kay ginpatay ikaw, kag paagi sa imo dugo gintubos mo ang mga tawo agod mangin iya sang Dios. Ginpili mo sila sa tanan nga tribo, lingguahe, lahi kag nasyon." –Bugna 5:9

Gintugyan [ni Jesus] ang iya kaugalingon nga patyon agod maluwas kita sa tanan naton nga mga sala, kag agod mangin iya kita nga mga katawhan, nga matinlo kag gusto gid maghimo sing maayo. –Tito 2:14

Makapasalamat kamo sa Amay tungod nga ginhimo niya kamo nga takos sa pagbaton sang palanublion nga para sa iya mga katawhan, ang palanublion nga yara sa kasanag. Kay ginluwas niya kita halin sa gahom sang kadudulman kag ginsaylo niya kita sa ginharian sang iya hinigugma nga Anak. Paagi sa iya Anak gintubos niya kita, nga ang buot silingon, ginpatawad na niya ang aton mga sala. –Colosas 1:12-14

ANG DUGO NI CRISTO AMO ANG MAKAHUGAS SA ATON MGA SALA —10

Tungod nga karon ginpakamatarong na kita sang Dios paagi sa dugo ni Cristo, makasiguro gid kita nga tungod kay Cristo makalikaw kita sa silot sang Dios nga magaabot. Kag indi lang ina, kundi nagakalipay kita karon sa aton relasyon sa Dios paagi sa aton Ginoong Jesu-Cristo. Paagi sa iya napabalik na ang aton maayo nga relasyon sa Dios. –Roma 5:9, 11

Nahibaluan man ninyo kon ano ang ginbayad agod matubos kamo halin sa pagkabuhi ninyo nga wala sing pulos nga inyo ginpanubli sa inyo mga katigulangan. Ang gintubos sa inyo indi mga butang nga madula, pareho sang bulawan ukon pilak, kundi amo ang hamili nga dugo ni Cristo. Ang iya halimbawa pareho sang karnero nga matinlo kag wala gid deperensya nga ginhalad sa Dios. –1 Pedro 1:18, 19

Kon nagakabuhi kita sa kasanag, subong nga ang Dios kasanag, may paghiusa kita, kag ang dugo ni Jesus nga Anak sang Dios nagatinlo sa aton sa tanan ta nga mga sala. –1 Juan 1:7

MALUWAS KITA PAAGI SA PAGTOO KAY CRISTO —11

Tungod kay ginpakamatarong na kita paagi sa pagtuo kay Jesu-Cristo, maayo na ang aton relasyon sa Dios. Ini natabo tungod sa ginhimo sang aton Ginoong Jesu-Cristo. –Roma 5:1

Ang mga nasulat diri ginsulat agod magtuo kamo nga si Jesus amo ang Cristo, ang Anak sang Dios. Kag kon magtuo kamo sa iya, may kabuhi kamo nga wala sing katapusan. –Juan 20:31

Tungod sa bugay sang Dios naluwas kamo paagi sa inyo pagtuo kay Jesu-Cristo. Ini regalo sang Dios kag wala nabasi sa inyo maayo nga mga binuhatan, gani wala gid sing may makapabugal. –Efeso 2:8, 9

Ginapakamatarong sang Dios ang tawo paagi sa pagtuo kay Jesu-Cristo, kay ang Dios wala sing pinilian. Gani ang bisan sin-o nga magtuo kay Jesu-Cristo ginapakamatarong niya. –Roma 3:22

Nagpamangkot ang mga tawo kay Jesus, "Ti ano ang dapat namon nga himuon agod masunod namon ang gusto nga ipahimo sang Dios?" Nagsabat si Jesus, "Ang gusto sang Dios nga inyo himuon amo ini: magtuo kamo sa akon nga iya ginpadala." –Juan 6:28, 29

ANG KALUOY SANG DIOS —12

Ang gugma kag kaluoy sang GINOO wala sing katapusan. Amo ina nga wala kita malaglag sing bug-os. Matutom gid ang GINOO; ginapakita niya ang iya kaluoy kada adlaw. –Panalambiton 3:22, 23

Subong nga dako ang distansya sang langit sa duta, dako man ang iya paghigugma sa mga naga-tahod sa iya. –Salmo 103:11

Ginluwas niya kita indi tungod sa aton maayo nga mga binuhatan, kundi tungod sa iya kaluoy sa aton. Kag ginhimo niya ini paagi sa Espiritu Santo nga naghugas sa aton kag naghatag sing bag-o nga kabuhi. –Tito 3:5

O GINOO, wala na sing iban nga dios nga pareho sa imo. Ginpatawad mo ang mga sala sang imo nagkalabilin nga mga katawhan nga imo ginapanag-iyahan. Wala ka nagapabilin nga akig hasta san- o tungod kay ginakalipay mo ang paghigugma sa amon. –Miqueas 7:18

Pero wala sing katapusan ang gugma sang GINOO sa mga nagatahod sa iya, sa mga nagatuman sang iya kasugtanan, kag sa mga nagadumdom sa pagtuman sang iya mga sugo. Kag ang iya matarong nga ginahimo magapadayon sa ila mga kaliwat. –Salmo 103:17, 18

NAGAAGDA ANG DIOS SA ATON SA PAGPALAPIT SA IYA —13

Nagasiling ang GINOO, "Dali kamo, husayon naton ini. Bisan ano kahigko sang inyo mga sala, limpyuhan ko ina agod mangin matinlo kamo." –Isaias 1:18

"Palapit kamo sa akon, tanan kamo nga ginabudlayan kag ginabug-atan kag papahuwayon ko kamo. Magsunod kamo kag magpatudlo sa akon kay malulo ako kag mabuot. Makapahuway kamo, kay ang akon mga sugo mahapos nga tumanon kag mamag-an lang ang akon ginapahimo." –Mateo 11:28-30

"Palapit kamo, tanan kamo nga ginauhaw, yari ang tubig! Bisan wala kamo sing kuwarta, magbakal kamo kag magkaon! Dali kamo, magbakal kamo sang bino kag gatas nga wala sing bayad!" –Isaias 55:1

Karon, nag-abot ang katapusan nga adlaw sang piesta. Amo ini ang pinakaimportante nga adlaw sang piesta. Sa sadto nga adlaw nagtindog si Jesus kag naghambal sing mabaskog, "Ang bisan sin-o nga ginauhaw magpalapit sa akon kag mag-inom." –Juan 7:37

INDI TANAN NGA TAWO ANAK SANG DIOS —14

Sa sini makilala kon sin-o gid ang mga anak sang Dios kag kon sin-o ang mga anak ni Satanas: Ang tawo nga wala nagahimo sang matarong ukon wala nagahigugma sa iya utod indi anak sang Dios. –1 Juan 3:10

"Dapat kamo magpalayo kag magbulag sa mga tawo nga wala nagatuo sa akon. Indi kamo magpakigbahin sa bisan ano nga mahigko sa akon panulok, kag batunon ko kamo. Kag ako mangin inyo Amay, kag kamo mangin akon mga anak. Amo ini ang siling sang Ginoo nga makagagahom." –2 Corinto 6:17, 18

Kon ano ang inyo ginahimo, himua ninyo nga wala sing pagkumod ukon pagbinaisay, agod ma-ngin himpit kamo nga mga anak sang Dios, nga matinlo kag wala sing kasawayan sa inyo pagkabuhi sa sining kalibutan nga sa diin ang mga tawo malain kag makasasala. Dapat ang inyo halimbawa pareho sang mga suga nga nagasanag sa ila. –Filipos 2:14, 15

Ang bisan sin-o nga nagbaton kag nagtuo sa iya ginhatagan niya sing kinamatarong nga ma-ngin anak sang Dios. –Juan 1:12

ANO ANG GINASILING SANG DIOS PARTE SA PAGPAHUBOG —15

Isuklob naton ang maayo nga kabuhi bilang armas naton nga mga yara na sa kasanag. Indi kita magpahubog ukon magsunod sa mga mahigko nga pagkinalipay. Indi kita magpakighilawas ukon maghimo sang bisan ano nga klase sang mahigko nga buhat. Indi kita mag-inaway ukon maghisaay. Sa baylo, ang pamatasan ni Ginoong Jesu-Cristo ang dapat makita sa inyo kabuhi. Kag indi ninyo paghatagan sing lugar ang inyo tawhanon nga kinaugali nga maghimo sang malain. –Roma 13:13, 14a

Ang mga tawo nga ang ila lang tawhanon nga kinaugali ang ila ginasunod mahibaluan gid paagi sa ila ginahimo: nagapakighila-was sila, mahigko kag malaot ang ila mga ginahimo. Nagasimba sila  mga dios-dios, mga
babaylan, naga-kontrahanay, nagailinaway, maimon maakigon, dalok, nagabinahin-bahin kag nagagrupo-grupo, nagahisaay, palahubog, maluyagon sa mga kalibutanon nga kasadyahan, kag kon ano pa ang ila mga ginahimo nga mahigko...nga ang mga tawo nga naghimo sining mga butang indi makapanubli sang ginharian sang Dios.  –Galacia 5:19-21

ANG PAGHIMO SANG MAAYO KULANG PA —16

Nagpamangkot ang tawo, "Maayo nga Manunudlo, ano bala ang akon himuon agod makaangkon ako sang kabuhi nga wala sing katapusan?" Nagsabat si Jesus sa iya, "Ngaa nagasiling ka nga maayo ako? Wala gid sing bisan sin-o nga maayo kundi ang Dios lang. Kon parte sa imo pamangkot, nahibaluan mo naman ang ginasi-ling sang Kasuguan: ‘Indi ka magpatay, indi ka magpanginbabayi ukon magpanginlalaki, indi ka magpangawat, indi ka magsaksi sang butig, indi ka magpangdaya, tahura ang imo amay kag iloy." Nagsabat siya kay Jesus, "Manunudlo, ini tanan gintuman ko halin sang bata pa ako." Gintulok siya ni Jesus nga may paghigugma kag
ginsilingan, "Isa pa ka butang ang kulang sa imo. Pauli ka kag ibaligya ang imo pagkabutang, kag ang kuwarta ipanagtag mo sa mga imol. Sa sini nga paagi ma-ngin manggaranon ka sa langit. Dayon magbalik ka kag magsunod sa akon." Nagkasubo gid ang tawo sang pagkabati niya sadto kag naghalin siya nga masinulob-on, kay madamo ang iya manggad. –Marcos 10:17b-22

INDI KA MAGPADAYA —17

Indi lamang kamo magpamati sa iya mga pulong kundi dapat tumanon ninyo ang iya ginasiling sa inyo. Kay kon indi, ginadayaan ninyo ang inyo kaugalingon. –Santiago 1:22

Indi bala nga ang tawo nga nagahimo sang malaot indi makapanubli sang ginharian sang Dios? Gani indi ninyo pagdayai ang inyo kaugalingon! Kay indi gid makapanubli sang ginharian sang Dios ang mga nagapakighilawas, ang mga nagasimba sa mga dios-dios, ang mga nagapanginbabayi kag mga nagapanginlalaki, ang mga lalaki nga nagabaligya sang ila dungog, ang mga lalaki nga nagauluasawa sa pareho nila nga lalaki, ang mga kawatan, ang mga dalukdalok, ang mga palahubog, ang mga nagahambal sang malain kontra sa iya isigkatawo, kag
ang mga tulisan. –1 Corinto 6:9, 10

Tungod sining mga ginahimo sang mga tawo, silutan sila sang Dios kay wala sila nagatuman sa iya. Gani indi kamo magpainto sa iban nga nagasiling nga ini nga mga butang indi mahigko. –Efeso 5:6

ANG SALA NAGADALA SANG KAMATAYON —18

Ang sala nagsulod sa kalibutan tungod sang paglapas ni Adan sa sugo sang Dios, kag ang iya sala nagdala sang kamatayon. Gani nag-abot ang kamatayon sa tanan nga mga tawo, tungod kay ang tanan nakasala. –Roma 5:12

Kon ang malain nga handom [sang tawo] matuman, ang resulta sini amo ang paghimo sang sala; kag kon magpadayon ang tawo sa pagpakasala, ang iya padulungan amo ang kamatayon. –Santiago 1:15

Ang tawo lang nga nakasala amo ang mapatay. Ang anak indi dapat silutan tungod sa sala sang iya amay, kag ang amay indi dapat silutan tungod sa sala sang iya anak. Ang matarong nga tawo pagabalusan sa iya matarong nga mga ginahimo, kag ang malaot nga tawo pagasilutan sa iya malaot nga mga ginahimo. –Ezekiel 18:20

Indi bala mga ulipon kita sang bisan ano nga aton ginatuman? Gani kon nagahimo kita sang sala, mga ulipon kita sang sala kag ang resulta sini kamatayon. Pero kon nagatuman kita sa Dios, mga ulipon kita sang Dios kag ang resulta sini amo nga pakamatarungon niya kita. –Roma 6:16

GINDAOG NI CRISTO ANG KAMATAYON —19

Nagpalapit si Jesus sa lungon kag gintandog niya agod magpundo ang mga nagadala. Nagsiling si Jesus sa patay, "Noy, magbangon ka!" Nagbangon ang patay, nagpungko kag naghambal. –Lucas 7:14, 15a

Nagsiling si Jesus, "May kabuhi ako nga wala sing katapusan. Napatay ako, pero tan-awa, buhi ako, kag indi na gid mapatay. May gahom ako sa kamatayon kag sa lugar sang mga patay." –Bugna 1:18

Nagsiling si Jesus, "Ginapalangga ako sang Amay tungod kay ginahatag ko ang akon kabuhi para sa ila, kag pagkatapos mabuhi man ako liwat. Wala sing may makapatay sa akon kon indi ko ini pag-itugot. Pero kabubut-on ko nga ginahatag ang akon kabuhi. Pagusto ako sa paghatag sini, kag pagusto man ako sa pagbawi sini. Amo ini ang ginsiling sang Amay sa akon." –Juan 10:17, 18

Nagsinggit si Jesus, "Lazaro, guwa ka!" Kag nagguwa matuod ang napatay nga si Lazaro nga ang iya kamot kag tiil may nagasambod pa nga mga tela, kag ang iya guya naputos man sang panyo. Nagsiling si Jesus sa ila, "Hubari ninyo siya kag palakta." –Juan 11:43b, 44

ANG MGA SUGO SANG DIOS —20

Indi kamo magsimba sa iban nga dios magluwas sa akon. 

Indi kamo maghimo sang mga dios-dios sa dagway sang bisan ano nga yara sa langit ukon sa duta ukon sa tubig. 

Indi gid ninyo ini pag-alagaron kag simbahon, kay ako, ang GINOO nga inyo Dios, indi gusto nga may ginasimba kamo nga iban...

Indi ninyo paggamita ang akon ngalan sa wala sing pulos kay ako, ang GINOO nga inyo Dios,
magasilot sa kay bisan sin-o nga maggamit sang akon ngalan sa wala sing pulos.

Tumana ninyo ang Adlaw nga Inugpahuway, kag himua ninyo ini nga pinasahi nga adlaw para sa akon, ang GINOO nga inyo Dios, suno sa ginmando ko sa inyo.

Mag-obra kamo sa sulod sang anom ka adlaw, pero ang ikapito nga adlaw amo ang Adlaw nga Inugpahuway nga inyo painon para sa akon, ang GINOO nga inyo Dios...

Tahura ninyo ang inyo amay kag iloy, suno sa ginmando ko sa inyo agod magkabuhi kamo sing malawig kag mangin maayo ang inyo kahimtangan sa duta nga ginahatag ko sa inyo.

Indi kamo magpatay.
Indi kamo magpanginbabayi ukon magpanginlalaki.
Indi kamo magpangawat.
Indi kamo magsaksi sing butig batok sa inyo isigkatawo.
Indi kamo magkaibog sa asawa sang inyo isigkatawo ukon sa iya balay, duta, mga suluguon, mga kasapatan, ukon sa bisan ano nga yara sa iya.   –Deuteronomio 5:7-21

INDI IKAW MAKAPANAGO SA DIOS —21

Nakita sang GINOO ang tanan mo nga ginahimo; kag bisan diin ka magkadto nagatan-aw siya. –Hulubaton 5:21

Wala sing may makapanago sa sekreto nga mga lugar nga indi ko makita Wala bala kamo makahibalo nga yara ako bisan diin sa langit kag sa duta? –Jeremias 23:24

Kon magsaka man ako sa langit, didto ikaw; kon magkadto man ako sa lugar sang mga patay, didto man ikaw...bisan ang kadulom indi madulom para sa imo, kag ang gab-i pareho lang kasanag sang adlaw. Kay ang kadulom kag ang kasanag pareho lang sa imo. –Salmo 139:8, 12

Makita sang GINOO ang tanan, bisan sa diin nga lugar. Ginatan-aw niya ang mga ginahimo sang mga malaot kag sang mga matarong. –Hulubaton 15:3

ANG MGA INDI DIOSNON PAGASILUTAN SA WALA SING KATAPUSAN —22

"Paagi sa pulong sang Dios, ang langit kag ang duta nga aton nakita karon ginatigana nga sunugon. Ginatigana niya ini sa adlaw nga ang malaot nga mga tawo pa-gahukman kag pagalaglagon." –2 Pedro 3:7

"[Ang mga malaot] pahalinon kag silutan sa wala sing katapusan. Pero ang mga matarong hatagan sang kabuhi nga wala sing katapusan." –Mateo 25:46

Nagsiling si Jesus, "Ako nga Anak sang Tawo magapadala sang akon mga anghel agod tipunon kag pagguwaon sa akon ginharian ang tanan nga nagahimo sang malain nga nangin kabangdanan sang pagpakasala sang iban. Dayon ipilak sila sa impyerno. Kag didto magahibi sila kag magabagrot ang ila mga ngipon."   –Mateo 13:41, 42

"Kon ang imo kamot ukon tiil mangin kabangdanan sang imo pagbiya sa akon, utda ina kag ipilak! Mas maayo pa nga isa lang ang imo kamot ukon tiil pero may kabuhi ka nga wala sing katapusan sang sa kompleto ang imo kamot kag tiil pero ipilak ka man lang sa kalayo nga wala sing katapusan." –Mateo 18:8

MAGAABOT ANG PAGHUKOM —23

Nakita ko ang mga nagkalamatay, bantog man ukon indi, nga nagatilindog sa atubangan sang trono. Ginpang-abrihan dayon ang mga libro, pati ang libro nga ginlistahan sang mga may ka-bugi nga wala sing katapusan. Ginhukman ang mga patay suno sa ila mga binuhatan nga nakasulat didto sa mga libro. –Bugna 20:12

Ang kada isa sa aton magapanabat sa Dios sa iya mga ginhimo diri sa kalibutan. –Roma 14:12

Ang tawo kaisa gid lang mapatay, kag pagkatapos hukman na siya sang Dios. –Hebreo 9:27

"May adlaw nga ginpili ang Dios nga hukman niya sing matarong ang tanan nga mga tawo diri sa kalibutan paagi sa tawo nga iya ginpili. Ginpamatud-an niya ini sa tanan paagi sa iya pagbanhaw sang amo nga tawo."
–Binuhatan 17:31

Kita tanan kinahanglan gid nga mag-atubang kay Cristo sa ulihi nga mga inadlaw agod hukman niya. Kag ang tagsa-tagsa sa aton magabaton sang balos suno sa aton hinimuan, maayo ukon malain man, sang nagakabuhi pa kita diri sa kalibutan. –2 Corinto 5:10

ANG BUGANA NGA BUGAY NI CRISTO JESUS —24

Nahibaluan man ninyo ang ginhimo sang aton Ginoong Jesu-Cristo, nga bisan manggaranon siya didto sa langit nagpakaimol siya paagi sa iya pagpakatawo tungod sa iya kaluoy sa aton, agod mangin manggaranon kita.
–2 Corinto 8:9

Padayon ang paghimo sang mga apostoles sang makatilingala nga mga butang sa pagpamatuod nga si Ginoong Jesus nabanhaw gid. Kag dako gid ang bulig sang Dios sa tanan nga mga tumuluo. –Binuhatan 4:33

"Ang regalo sang Dios indi ma-paanggid sa sala ni Adan. Matuod gid nga ang sala ni Adan nagdala sing kamatayon sa madamo nga mga tawo, pero labaw pa gid sa sini ang bugay sang Dios nga amo ang regalo nga nag-abot sa madamo nga mga tawo paagi sa isa ka tawo nga si Jesu-Cristo." –Roma 5:15b

Ang kaayo sang Dios wala nabasi sa gusto ukon sa ginahimo sang tawo, kundi tungod gid lang sa kaluoy sang Dios. –Roma 9:16

"Ginasumpo sang Dios ang bugalon, pero ginakaluoyan niya ang mapainubuson." –1 Pedro 5:5b

MAGHINULSOL KITA SA ATON MGA SALA —25

"Maghinulsol kamo kag bayai na ninyo ang inyo mga sala, kay ang paghari sang Dios malapit na!"            –Mateo 3:2

Ang kasubo nga suno sa kabubut-on sang Dios nagadala sa tawo sa paghinulsol, kag ina nagaresulta sing kaluwasan nga indi dapat hinulsulan. Pero ang kasubo sang mga tawo nga wala nagakilala sa Dios nagadala sa ila sa kamatayon. –2 Corinto 7:10

Untati na ninyo ang inyo pagpakasala kag bag-uha na ninyo ang inyo pagkabuhi kay indi kamo dapat mapatay, O katawhan sang Israel. –Ezekiel 18:31

Karon, kinahanglan maghinulsol na kamo kag magpalapit sa Dios, agod patawaron niya ang inyo mga sala.    –Binuhatan 3:19

Sang una, sang wala pa makakilala ang mga tawo sa Dios, wala niya pagsapaka ang ila mga sala. Pero karon ginasugo sang Dios ang tanan nga mga tawo sa tanan nga mga lugar nga maghinulsol na kag bayaan ang ila malain nga mga ginahimo. –Binuhatan 17:30

Sugiran ko kamo, kon indi kamo maghinulsol kag magtalikod sa inyo mga sala, kamo tanan mapatay man.         –Lucas 13:3b

MAY KAPATAWARAN ANG ATON MGA SALA —26

Pagkakita ni Jesus sang ila pagtuo sa iya, nagsiling siya sa paralitiko, "Ginpatawad na ang imo mga sala." –Marcos 2:5

Magbiya na ang mga malaot sa ila malaot nga pagginawi kag magbaylo na si ila malaot nga panghunahuna. Magbalik na sila sa GINOO nga aton Dios kay kaluoyan niya sila kag patawaron. –Isaias 55:7

Kon ang malaot maghinulsol sa tanan nga mga sala nga iya nahimo kag magtuman sang akon pagsulundan kag maghimo sing matarong kag husto, indi siya mapatay kundi padayon siya nga mabuhi. –Ezekiel 18:21

Nagatindog ako sa puwertahan kag nagapanuktok. Kon may makabati sang akon panawag kag padayunon niya ako sa iya balay, madayon ako, kag magaupod kami kaon. –Bugna 3:20

"Kon ginapatawad ninyo ang mga tawo nga nakasala sa inyo, patawaron man kamo sang inyo Amay nga sa langit. –Mateo 6:14

LIKAWI ANG SALA NGA GINAHIMO SANG MGA TAWO SA KALIBUTAN —27

Indi kamo magsunod sa mga wala pulos nga ginahimo sang iban nga nadulman. Sa baylo, ipakita ninyo sa ila nga malain ang ila ginahimo. –Efeso 5:11

Indi ninyo paghigugmaa ang kalibutan ukon ang kalibutanon nga mga butang. Kon ginahigugma ninyo ang kalibutan, wala kamo nagahigugma sa Amay. Kay ang tanan nga kalibutanon nga ginahandom sang tawhanon nga balatyagon, nga ginakawilihan sang mga mata, kag ginapabugal sang mga tawo, wala nagahalin sa Amay kundi sa kalibutan. –1 Juan 2:15, 16

Ginpakita na sang Dios sa tanan nga klase sang mga tawo ang iya bugay nga nagahatag sing kaluwasan. Kag ina nga bugay nagatudlo sa aton nga dapat isikway ta na ang pagkabuhi nga indi diosnon kag ang mga kalibutanon nga mga kailigbon. Dapat magkabuhi kita diri sa sini nga kalibutan nga nakahibalo magtimbang-timbang kon diin ang husto ukon indi. Kag dapat matarong kag diosnon ang aton ginahimo. –Tito 2:11, 12

ANG PAGKATAWO LIWAT —28

Nagsabat si Jesus, "Sa pagkamatuod, ginasugid ko sa imo nga wala sing tawo nga masakop sa paghari sang Dios kon indi siya matawo liwat." –Juan 3:3

Nahibaluan ta nga wala sing tawo nga nangin anak sang Dios nga nagapadayon sa pagpakasala, kundi ginatipigan siya sang Anak sang Dios, gani indi siya matandog ni Satanas. –1 Juan 5:18

Ang bisan sin-o nga yara kay Cristo bag-o na nga tawo. Wala na ang iya daan nga pagkatawo, kundi bag-o na siya. –2 Corinto 5:17

Natawo na kamo liwat. Kag ini nga pagkatawo indi paagi sa inyo mga ginikanan nga may kamatayon, kundi paagi sa pulong sang Dios nga buhi kag wala sing katapusan. –1 Pedro 1:23

Hatagan ko kamo sang bag-o nga tagipusuon kag bag-o nga espiritu. Ang matig-a ninyo nga tagipusuon mangin matinumanon na nga tagipusuon. –Ezekiel 36:26

NAPATAY NA KITA SA SALA KAG NABANHAW UPOD KAY CRISTO —29

Kon ginakilala ninyo nga ginbanhaw kamo kaupod ni Cristo, pasulabiha ninyo ang mga butang nga didto sa langit sa diin nagapungko si Cristo sa tuo sang Dios. –Colosas 3:1

Ang mga tawo nga iya na ni Cristo Jesus, ginlansang na nila ang ila tawhanon nga mga balatyagon kag handom didto sa krus. –Galacia 5:24

"Patay kamo sang una sa panulok sang Dios tungod sa inyo mga paglapas kag mga sala. Kag tu-ngod sang aton paghiusa kay Cristo Jesus ginbanhaw niya kita upod kay Cristo agod maghari kita upod sa iya sa langitnon nga ginharian. –Efeso 2:1, 6

Gani tungod nga kamo yara na kay Cristo Jesus, kabiga ninyo nga ang inyo kaugalingon patay na sa sala, kag karon nagakabuhi na kamo para sa Dios. –Roma 6:11

Si Cristo mismo amo ang nag-ako sang aton mga sala sang siya ginlansang sa krus, agod indi na kita magpakasala kundi magkabuhi kita nga matarong. Tungod sa iya mga pilas gin-ayo kita. –1 Pedro 2:24

ANG KABUHI NGA WALA SING KATAPUSAN —30

Ang bayad sang sala amo ang kamatayon, pero ang kabuhi nga wala sing katapusan amo ang regalo sang Dios sa mga yara kay Cristo Jesus nga aton Ginoo. –Roma 6:23

Kon sundon ta ang aton gid lang nga gusto, mabaton naton halin sa sini ang silot nga wala sing katapusan. Pero kon sundon ta ang gusto sang Espiritu Santo, mabaton naton halin sa sini ang kabuhi nga wala sing katapusan.
–Galacia 6:8

"Sa pagkamatuod, ginasugid ko sa inyo nga ang tawo nga nagatuman sang akon mga pulong kag nagatuo sa nagpadala sa akon may kabuhi nga wala sing katapusan. Indi na siya pagsilutan tungod kay ginsaylo na siya halin sa kamatayon pakadto sa kabuhi." –Juan 5:24

"Pareho sang ginhimo ni Moises sa iya pagbayaw sang man-og sa kamingawan, sa amo man nga paagi, ako nga Anak sang Tawo kinahanglan nga pagabayawon man, agod ang kada isa nga magtuo sa akon makaangkon sang kabuhi nga wala sing katapusan." –Juan 3:14b, 15

ANG KASIGURUHAN SANG ATON KALUWASAN —31

Ang Espiritu Santo upod sa aton espiritu amo ang nagapamatuod nga kita mga anak sang Dios. –Roma 8:16

Mga anak, indi lang kita maghambal nga nagahigugma kita, kundi ipakita ta sa aton mga ginahimo nga matuod nga nagahigugma kita. Sa sini nga paagi, nahibaluan naton nga yara kita sa kamatuoran, kag sarang na kita makaatubang sa Dios nga wala sing kahadlok. –1 Juan 3:18, 19

"Ang tawo nga nagabaton kag nagatuman sang akon mga sugo amo ang nagahigugma sa akon. Kag ang nagahigugma sa akon higugmaon man sang akon Amay. Higugmaon ko man siya, kag ipakilala ko sa iya kon sin-o gid ako." –Juan 14:21

Ang bunga sang pagkamatarong amo ang maayo nga kahimtangan, kalinong, kag kasiguruhan sa wala sing katapusan. –Isaias 32:17

Tungod nga kita mga anak na sang Dios, ginpadala niya ang Espiritu sang iya Anak sa aton mga tagipusuon. Amo ina nga makatawag na kita sa Dios nga "Amay." –Galacia 4:6

MAY KALIPAY KITA KON MAGPUYO SI CRISTO SA ATON KABUHI —32

Nagsiling si Jesus sa iya Amay, "Karon mabalik na ako dira sa imo. Ini nga mga butang ginasugid ko na nga daan samtang diri pa ako sa kalibutan, agod malipay gid sila pareho sa akon." –Juan 17:13

Ang ginharian sang Dios indi parte sa pagkaon kag pag-inom, kundi parte sa matarong nga kabuhi, maayo nga relasyon sa isa kag isa, kag kalipay nga halin sa Espiritu Santo.  –Roma 14:17

Napatay ako kaupod ni Cristo sa krus. Indi na ako ang nagakabuhi karon, kundi si Cristo na ang nagakabuhi sa akon. Kag ining kabuhi nga akon ginakabuhi karon amo ang resulta sang akon pagtuo sa Anak sang Dios
nga naghigugma sa akon kag naghalad sang iya kabuhi para sa akon. –Galacia 2:20

"Ginasugid ko ini sa inyo agod malipay man kamo pareho sa akon, kag mangin bug-os gid ang inyo kalipay."  –Juan 15:11

Ginatudluan mo ako kon paano ko maangkon ang maayo nga kabuhi. Tungod sang imo malapit nga presensya sa akon, wala sing katapusan ang akon dako nga kalipay. –Salmo 16:11

KINAHANGLAN ANG PAGTUMAN SA GINOO —33

"Pamati! Ginapapili ko kamo karon sa pagpakamaayo ukon sa pagpakamalaot. Pakamaayuhon kamo kon tumanon ninyo ang mga sugo sang GINOO nga inyo Dios nga ginahatag ko sa inyo karon. Pakamalauton kamo kon indi ninyo pagtumanon ini nga mga sugo sang GINOO nga ginahatag ko sa inyo karon...." –Deuteronomio 11:26-28a

Kon indi kamo magsunod sa GINOO, kag indi magtuman sa iya mga sugo, silutan niya kamo, pareho sa ginhimo niya sa inyo mga katigulangan. –1 Samuel 12:15

Kamo nga nagaantos papahuwayon niya kaupod sa amon. Matabo ini sa pagbalik ni Ginoog Jesus halin sa langit kaupod sang iya gamhanan nga mga anghel. Sa iya palibot may nagadabadaba nga kalayo, kag silutan niya ang mga tawo nga wala nagakilala sa Dios kag wala nagatuman sa Maayong Balita parte sa aton Ginoong Jesus. Pagasilutan sila sang wala sing katapusan nga kalaglagan, nga nahamulag sa Ginoo kag indi gid nila makita ang iya makatilingala nga gahom. –2 Tesalonica 1:7-9

KINAHANGLAN ANG PAGSUGID PARTE KAY CRISTO —34

Kon isugid mo nga si Jesus amo ang Ginoo kag nagatuo ka sa imo tagipusuon nga ginbanhaw siya sang Dios halin sa kamatayon, maluwas ka. Kay ang tawo ginapakamatarong sang Dios kon nagatuo siya sing hugot sa iya tagipusuon. Kag kon magsugid siya sang iya pagtuo, maluwas siya. –Roma 10:9, 10

"Ang bisan sin-o nga nagasugid sa mga tawo nga ako iya Ginoo, kilalahon ko man siya sa atubangan sang akon Amay sa langit. Pero ang bisan sin-o nga nagapanginwala sa akon sa atubangan sang mga tawo, ipanginwala ko man sa atubangan sang akon Amay sa langit." –Mateo 10:32, 33

Ang bisan sin-o nga nagakahuya sa akon kag sa akon mga ginatudlo, igakahuya ko man kon ako nga Anak sang Tawo magbalik na nga nagasilak sa gahom nga halin sa akon kag sa Amay kag sa mga anghel. –Lucas 9:26

Ang nagapanginwala sang Anak wala sa iya ang Amay, pero ang nagakilala sang Anak yara sa iya ang Amay. –1 Juan 2:23

SI SATANAS ANG ATON DAKO NGA KAAWAY —35

Kon magpakita na ining malaot nga tawo, gamiton niya ang gahom ni Satanas. Magahimo siya sang tanan nga klase sang mga milagro kag makatilingala nga mga butang nga daw halin sa Dios pero indi. –2 Tesalonica 2:9

Mag-andam kag magbantay kamo! Kay ang inyo kaaway nga si Satanas nagalibot-libot pareho sang leon nga nagangurob kag nagapangita sang tulukbon. –1 Pedro 5:8

Pagkatapos sadto, gindala sang Espiritu Santo si Jesus sa kami-ngawan agod sulayon ni Satanas.... Dayon nagsiling si Jesus, "Palayo ka Satanas! Ang Kasulatan nagasiling, ‘Simbahon mo ang Ginoo nga imo Dios kag siya gid lang ang imo alagaron.'" Dayon naghalin si Satanas. –Mateo 4:1, 10-11a

"‘Luwason ko ikaw sa mga Judio kag sa mga indi Judio. Suguon ko ikaw sa ila sa pagpamuklat sang ila mga mata agod magliso sila halin sa kadudulman pakadto sa kasanag, kag halin sa gahom ni Satanas pakadto sa Dios. Kag paagi sa ila pagtuo sa akon, patawaron sila sa ila mga sala, kag makaupod na sila sa mga ginpain sang Dios nga mangin iya.'" –Binuhatan 26:17b, 18

ANG PAGDAOG BATOK KAY SATANAS —36

Tungod nga ang ginatawag [ni Jesus] nga mga anak sang Dios mga tawo nga may lawas kag dugo, si Jesus mismo nagpakatawo man agod ihalad niya ang iya kaugalingon para sa ila, kay paagi sa iya kamatayon mapierde niya si Satanas nga amo ang ginahalinan sang kamatayon sang mga tawo. –Hebreo 2:14

Nasiguro ko gid nga wala sing may makapahamulag sa aton sa gugma sang Dios nga iya ginpakita paagi kay Cristo Jesus nga aton Ginoo. Bisan pa ang kabuhi diri ukon ang kamatayon, ang mga anghel ukon ang mga demonyo, ang nagkalatabo karon ukon ang magakalatabo sa palaabuton, ang mga may gahom, ang mga yara sa ibabaw ukon sa idalom sang kalibutan, ukon bisan ano pa nga mga butang nga gintuga sang Dios indi makapahamulag sa aton sa iya gugma. –Roma 8:38, 39

Mag-andam kag magbantay kamo! Kay ang inyo kaaway nga si Satanas nagalibot-libot pareho sang leon nga nagangurob kag nagapangita sang tulukbon. Palig- una ninyo ang inyo pagtuo sa Dios kag pamatuki ninyo si Satanas. –1 Pedro 5:8, 9a

ANG GUGMA AMO ANG TALAKSAN SANG PAGKASUMULUNOD NI CRISTO —37

Bisan makahambal ako sang nagkalain-lain nga mga lingguahe sang mga tawo kag sang mga anghel, pero kon wala ako sing gugma sa akon isigkatawo, daw pareho lang ako sa agong nga magahod ukon lingganay nga matagsing. –1 Corinto 13:1

Pagkatapos nila pamahaw, nagsiling si Jesus kay Simon Pedro, "Simon nga anak ni Juan, ginahigugma mo bala ako labaw pa sa imo mga kaupod nga ini?" Nagsabat si Pedro, "Huo, Ginoo, nahibaluan mo nga ginahigugma ko ikaw." Nagsiling si Jesus sa iya, "Atipana ang akon mga karnero." –Juan 21:15

Yari ang makita sa pagkabuhi sang tawo kon ang Espiritu Santo amo ang nagagahom sa iya: mahigugmaon siya, malipayon, malinong ang iya pagkabuhi,  ma-inantuson, malulo, maalwan, masaligan, mabuot kag makapugong sang iya kaugalingon. –Galacia 5:22, 23a

"Kon nagahigugmaanay kamo, sa sini mahibaluan sang tanan nga kamo akon mga sumulunod." –Juan 13:35

ANG PAGKABANHAW NI CRISTO JESUS —38

Kami mismo makapamatuod sang tanan niya nga ginpanghimo tungod nga nakita namon ini sa Jerusalem kag sa iban nga mga banwa sang mga Judio. Ginpatay siya sang mga Judio paagi sa paglansang sa iya sa krus. Pero ginbanhaw siya sang Dios sa ikatlo nga adlaw kag ginpakita sa amon nga siya buhi. Wala siya ginpakita sa tanan kundi sa amon lang nga mga pinili sang Dios nga mga saksi agod ibalita sa iban ang parte sa iya. Sa tapos siya nabanhaw, nagkaon kag nag-inom kami kaupod niya. –Binuhatan 10:39-41

Pagkaligad sang isa ka semana, nagtilipon liwat ang mga sumulunod ni Jesus sa balay nga ila ginatipunan, kag kaupod na nila si Tomas. Ginpangtrangkahan nila ang mga puwertahan sang balay, pero nagsulod liwat si Jesus
kag nagtindog didto sa ila tunga. Nagsiling siya sa ila, "Kabay pa nga ang kalinong yara sa inyo." Dayon nagsiling siya kay Tomas, "Tomas, dali, tan-awa ang akon mga kamot kag tanduga ang akon mga pilas. Igulo man dayon ang imo kamot sa akon kilid. Indi ka na magpangduha-duha, kundi magtuo ka na." Nagsiling si Tomas kay Jesus, "Ginoo ko kag Dios ko!" –Juan 20:26-28

ANG PAGKABANHAW AMO ANG ATON MATAHOM NGA PAGLAOM —39

Nabanhaw si Cristo halin sa kamatayon kag amo ini ang nagapamatuod nga banhawon ang mga patay ...Sa pagtunog sang ulihi gid nga trumpeta, banhawon gilayon ang mga patay kag hatagan sang lawas nga indi na madunot. Kag kita nga buhi pa, bag-uhon man ang aton mga lawas. –1 Corinto 15:20b, 52b

"Indi kamo matingala sa sini nga mga butang, kay magaabot ang tion nga ang tanan nga mga patay makabati sang akon pulong, kag magaguwa sila sa ila lulubngan. Ang mga tawo nga naghimo sing maayo banhawon kag hatagan sang kabuhi nga wala sing katapusan, kag ang mga tawo nga naghimo sing malain banhawon man pero silutan." –Juan 5:28-29

Ang pagbautiso sa aton nagapakilala nga sang napatay si Cristo, kita napatay man kag ginlubong upod sa iya, agod subong nga si Cristo ginbanhaw sang makagagahom nga Amay, kita magakabuhi man sang bag-o nga kabuhi. Kag kon nahiusa kita kay Cristo sa iya kamatayon, sigurado gid nga makaangkon kita sang bag-o nga kabuhi pareho sang natabo sa iya sang siya ginbanhaw. –Roma 6:4, 5

ANG PAGKABALAAN SA ATUBANGAN SANG GINOO —40

"Ina nga kasugtanan amo nga luwason gid niya kita sa aton mga kaaway agod nga makasimba kita nga wala sing kahadlok, kag mangin balaan kag matarong kita sa iya atubangan sa adlaw-adlaw naton nga pagkabuhi." –Lucas  1:74, 75

Mga hinigugma, tungod sining mga promisa sang Dios sa aton, bayaan ta na ang tanan nga nagapahigko sa aton bug-os nga kabuhi, kag tinguhaan ta nga ma-ngin matinlo ang aton kabuhi nga may pagtahod sa Dios. –2 Corinto 7:1

Ang bisan sin-o nga nagalikaw sa mga kalautan amo ang makabig nga mga galamiton nga malahalon nga ginpain para gamiton kag mapuslan sang Ginoo, kag sarang niya nga gamiton para sa kaayuhan sa bisan ano nga oras.
–2 Timoteo 2:21

Ginpili kamo sang Dios nga Amay halin pa sang una sa katuyuan nga himuon niya kamo nga iya mga anak paagi sa Espiritu Santo, agod tumanon ninyo si Jesu-Cristo kag matinluan kamo sa inyo sa-la paagi sa iya dugo. –1 Pedro 1:2

ANG PAGKABALAAN SA ATUBANGAN SANG GINOO —41

Tinguhai ninyo nga mangin maayo ang inyo relasyon sa tanan nga mga tawo, kag tinguhai man ninyo nga mangin matarong ang inyo kabuhi. Kay kon indi matarong ang inyo kabuhi indi kamo makakita sa Dios. –Hebreo 12:14

Kon ituad ta sa Dios ang aton  mga sala, masaligan siya sa pagpatawad sang aton mga sala kag sa pagtinlo sa tanan ta nga mga kalainan. Himuon niya ini tungod nga matarong siya. –1 Juan 1:9

Ipakita ninyo nga ginbag-o na kamo sang Dios kag ginhatagan sang kabuhi nga pareho sa iya, ang husto nga kabuhi nga matarong kag balaan. –Efeso 4:24

Pagabutangan sang malapad nga dalan sa sadto nga desierto, kag pagatawgon ini nga dalan nga "Balaan nga Dalan." Wala sing makasasala kag buang-buang nga makaagi didto. Ang mga tawo lang nga nagasunod sa mga pa-maagi sang Dios ang makaagi. –Isaias 35:8

Bisan sa wala pa matuga ang kalibutan, ginpili na kita nga daan sang Dios nga mangin balaan kag wala sing kasawayan sa iya panulok sa aton paghiusa kay Cristo. –Efeso 1:4a

ANG PAGPUNO SANG ESPIRITU SANTO SA MGA TUMULUO —42

Ang mga sumulunod ni Jesus didto sa Antioquia ginagamhan sang Espiritu Santo, kag malipayon gid sila.  –Binuhatan 13:52

Hatagan ko man kamo sang akon Espiritu agod masunod ninyo sing maayo ang akon mga sugo kag mga pagsulundan. –Ezekiel 36:27

Pagkatapos nila pangamuyo, nag-uyog ang balay nga ila ginatipunan. Gin-gamhan sila tanan sang Espiritu Santo kag nangisog sa pagwali sang pulong sang Dios. –Binuhatan 4:31

"Ti kon kamo nga mga tawo nga malaot makahibalo maghatag sang maayo nga mga butang sa inyo mga bata, daw ano pa gid ang inyo Amay sa langit! Ihatag gid niya ang Espiritu Santo sa mga nagapangayo sa iya."
–Lucas 11:13

Kamo wala na sa paggahom sang inyo tawhanon nga kinaugali. Kay kon ang Espiritu sang Dios nagapuyo sa inyo, ginagamhan na kamo sang Espiritu. Ang tawo nga wala sa iya ang Espiritu ni Cristo indi iya ni Cristo. 
–Roma 8:9

ANG MATAHOM NGA MGA PROMISA SANG DIOS SA MGA CRISTOHANON —43

Mga hinigugma, indi kamo magkatingala sa masakit nga mga pagtilaw nga inyo ginaagihan. Kon ginatilawan ang inyo pagtuo indi kamo maghunahuna nga kon daw ano na gid ang matabo sa inyo. Sa baylo, magkalipay kamo, kay nagaambit kamo sa mga pag-antos ni Cristo. Kag mabug-os na gid ang inyo kalipay kon mapakita na niya ang iya gahom sa tanan. –1 Pedro 4:12, 13

Magsalig ka sa GINOO kag maghimo sang maayo. Magpuyo ka sa duta nga wala sing may ginakahadlukan nga katalagman. –Salmo 37:3

"Pahiran niya ang ila mga luha. Wala na sing kamatayon, kasubo, paghibi ukon kasakit tungod kay ang daan nga mga butang nakaligad na." –Bugna 21:4

Indi bala ako ang naghimo sang tanan nga butang? Ginahatagan ko sang pagtalupangod ang mga tawo nga mapainubuson, kag mahinulsulon, kag nagakahadlok sa akon pulong. –Isaias 66:2

ANG MGA PROMISA SANG DIOS SA MGA GINATILAWAN —44

[Si Jesus] mismo nakaagi sang mga pag-antos sang siya ginsulay, gani sarang gid siya makabulig sa mga tawo nga ginasulay. –Hebreo 2:18

Kon mag-agi ka sa tubig, magaupod ako sa imo. Kon magtabok ka sa mga suba indi ka malumos. Kon mag-agi ka sa kalayo, indi ka mapaso; ang dabdab sini indi makaano sa imo. –Isaias 43:2

Wala sing pagsulay nga nagaabot sa inyo nga wala man nagaabot sa iban nga mga tawo. Pero masaligan ang Dios sa iya promisa nga indi niya kamo pagtugutan nga sulayon sing sobra sa inyo masarangan. Kag kon mag-abot ang mga pagsulay sa inyo, magahimo siya sing paagi agod madaog ninyo ini. –1 Corinto 10:13

Nakahibalo kita nga ang tanan nga nagakalatabo ginahimo sang Dios para sa kaayuhan sang mga nagahigugma sa iya, nga iya mga ginpili suno sa iya katuyuan. –Roma 8:28

Bisan madamo ang mga kalisod sang matarong nga mga tawo ginaluwas siya sang GINOO sa sining tanan. –Salmo 34:19

ANG MGA PROMISA SANG DIOS SA MGA MANDADAOG —45

Ang mga mandadaog himuon ko nga akon mga anak kag ako ma-ngin ila Dios. –Bugna 21:7

Ang mga mandadaog pabayuan sing puti, kag indi ko pagpanason ang ila mga ngalan sa libro nga ginlistahan sang mga may kabuhi nga wala sing katapusan. Ipakilala ko sila sa akon Amay kag sa iya mga anghel nga sila akon mga katawhan. –Bugna 3:5

"Ang nagapamati dapat maghunahuna kon ano ang ginasiling sang Espiritu Santo sa mga iglesya. Ang mga mandadaog tugutan ko nga magkaon sang bunga sang kahoy nga nagahatag sang kabuhi, kag ina nga kahoy didto sa Paraiso sang Dios." –Bugna 2:7

Ang mga mandadaog himuon ko nga pareho sa haligi sa puluy-an sang akon Dios, kag indi na gid sila maghalin didto. Markahan ko sila sang ngalan sang akon Dios, kag sang ngalan sang siyudad sang akon Dios, ang bag-o nga Jerusalem nga ipapanaog sang akon Dios halin sa langit. Markahan ko man sila sang akon bag-o nga ngalan. –Bugna 3:12

ANG GINAHAMBAL SANG DIOS PARTE SA PAGBULAGAY —46

Suno sa kasuguan, ang babayi nahigot sa iya bana samtang buhi pa ang iya bana. Pero kon ang iya bana patay na, hilway na siya sa kasuguan nga nagahigot sa iya sa iya bana. Gani kon magpamana siya sa iban nga lalaki samtang buhi pa ang iya bana, nagapanginlalaki siya. Pero kon ang iya bana patay na kag magpamana siya sa iban, wala siya nagalapas sa kasuguan, kag wala man siya nagapanginlalaki. –Roma 7:2b, 3

Sa mga mag-asawa, amo ini ang akon sugo nga ginhambal mismo sang Ginoo: ang asawa indi dapat magbulag sa iya bana, kag ang bana indi man magbulag sa iya asawa. Pero kon may asawa nga magbulag sa iya bana, dapat magpabilin siya nga wala sing bana, ukon indi gani magbalik na lang siya sa iya bana...Ang babayi nahigot sa iya bana samtang buhi pa ang iya bana. Ugaling kon patay na ang iya bana puwede na siya makapamana liwat. Pero kinahanglan tumuluo ang pilion niya. –1 Corinto 7:10-11, 39

MAGABALIK SI JESU-CRISTO DIRI SA KALIBUTAN —47

Kon didto na ako kag nakapreparar na sang lugar para sa inyo, mabalik ako agod kuhaon ko kamo, agod nga kon diin ako didto man kamo. –Juan 14:3

Ako nga Anak sang Tawo makita sa langit nga nagabalik sa kalibutan. Kag ang tanan nga tawo sa kalibutan magahibi kon makita nila ako sa mga panganod nga nagaabot nga may gahom nga nagasilak gid. –Mateo 24:30

"Ang bisan sin-o nga nagakahuya sa akon kag sa akon mga ginatudlo sa sini nga tiyempo, nga ang mga tawo malaot kag indi diosnon, igakahuya ko man kon ako nga Anak sang Tawo magbalik na nga nagasilak sa gahom sang akon Amay, kag kaupod ko ang balaan nga mga anghel." –Marcos 8:38

"Magbantay gid kamo, kay sa oras nga wala ninyo ginapaabot, ako nga Anak sang Tawo magaabot." –Lucas 12:40

"Kay ako nga Anak sang Tawo magabalik diri sa kalibutan nga nagasilak sa gahom sang akon Amay, kag kaupod ko ang iya mga anghel. Dayon hatagan  ko sang padya ang tanan nga tawo suno sa ila mga binuhatan." –Mateo 16:27

ANG PULONG SANG DIOS —48

Labaw sa tanan, tandai gid ninyo ini: ang tanan nga nasulat sa Kasulatan wala naghalin sa kaugalingon nga pag-intiendi sang mga propeta. Tungod nga wala sila naghambal halin sa ila kaugali-ngon nga hunahuna, kundi ang Espiritu Santo amo ang nagtuytoy sa ila sa paghambal sang pulong sang Dios. –2 Pedro 1:20, 21

Ang imo pulong pareho sang suga nga nagahatag kasanag sa akon alagyan. –Salmo 119:105

"Madula ang langit kag ang duta, pero ang akon mga pulong indi gid mahimo nga indi matuman." –Lucas 21:33

MANGAMUYO KAG MAGPATAWAD

"Gani magpangamuyo kamo sing pareho sini: ‘Amay namon nga yara sa langit, kabay pa nga tahuron ikaw sang mga tawo. Kabay pa nga maghari ka diri sa amon. Kag subong nga ang imo kabubut-on ginatuman dira sa la-ngit, kabay pa nga tumanon man diri sa kalibutan. Hatagi kami sang amon kinahanglanon nga pagkaon sa sini nga adlaw. Patawara kami sang amon mga sala, kay ginapatawad man namon ang nakasala sa amon. Indi mo kami pag-ipadaog sa mga pagsulay, kundi luwasa kami kay Satanas." –Mateo 6:9-13a

ANG PAMAAGI SANG DIOS AGOD MALUWAS ANG TAWO

Nagakinahanglan ako sang Manluluwas.
Kay ang tanan nga mga tawo nagpakasala kag indi takos sa panulok sang Dios. –Roma 3:23

Napatay si Cristo para sa akon.
Kay si Cristo gani ginpatay bisan wala siya nakahimo sing malain. Kag kaisa gid lang siya napatay agod mapatawad ang aton mga sala. Siya nga wala sing sala ginpatay para sa aton nga mga makasasala agod madala niya kita sa Dios. –1 Pedro 3:18a

Kinahanglan ko nga hinulsulan ang akon sala.
Gani karon, kinahanglan maghinulsol na kamo kag magpalapit sa Dios. –Binuhatan 3:19a

Kinahanglan ko nga batunon si Jesus paagi sa pagtuo.
Pero ang bisan sin-o nga nagbaton kag nagtuo sa iya ginhatagan niya sing kinamatarong nga mangin anak sang Dios. –Juan 1:12

Makasiguro ako sang akon kaluwasan.
Ang bisan sin-o nga yara sa iya ang Anak may kabuhi nga wala sing ka- tapusan. –1 Juan 5:12a

"Sa pagkamatuod, ginasugid ko sa inyo nga ang tawo nga nagatuman sang akon mga pulong kag nagatuo sa nagpadala sa akon may kabuhi nga wala sing katapusan. Indi na siya pagsilutan tungod kay ginsaylo na siya halin sa kamatayon pakadto sa kabuhi." –Juan 5:24

If you are interested in receiving additional Scripture booklets, write to the publisher in English at the address below or order online:

World Missionary Press, Inc. 
P.O. Box 120 
New Paris, Indiana 46553-0120 U.S.A.

Scripture text from Ang Pulong Sang Dios © 1997 by International Bible Society, Philippines.  Used by permission.

World Missionary Press Home Page | Go to the Top of This Page